Boarrásiidáittardeaddji doaimmahaga bargit gallededje Davvi-Suomas ja Sámis borgemánu loahpas. Mátkki áigge ledje deaivvadeamit guovllu boarrásiidráđiiguin, davvi gielddaid ovddasteaddjiiguin, Lappi buresveadjinguovllu ovddasteaddjiiguin ja sámeorganisašuvdna SámiSoster rs:in. Boarrásiidáittardeaddji deattuha, ahte doarvái buriid bálvalusaid oažžuma galgá dorvvastit maiddái davvi Suomas ja bálvalusain galgá vuhtiiváldit eallilan olbmo iežas giela ja kultuvrra.
Boarrásiidáittardeaddji galledii davvi Suomas borgemánu loahpas ja deaivvadii boarrásiidráđiiguin, gielddaid ja servviid ovddasteaddjiiguin Roavvenjárggas ja Anáris. Deaivvademiin ságastallojuvvui davvi Suomas ássi ahkeolbmuid vejolašvuođain doaibmat digitálalaš bálvalusaiguin dahje almmá digitálalaš rusttegiid haga, sosiála- ja dearvvašvuođabálvalusaid ja maid eará bálvalusaid oažžumis, buresveadjima ja dearvvašvuođa ovddideamis ja boarrásiidráđiid váikkuhanvejolašvuođain.
Davvi-Suomas boahtán oktavuođaváldimiin boarrásiidáittardeaddjái lea muitaluvvon erenomážit guhkes mátkegaskkaid birra, almmolaš johtolaga ja lagašbálvalusaid váilivuođas ja váttisvuođain oažžut bálvalusaid sámegielaiguin. Dát temát bohte ovdan maiddái ságastallamiin boarrásiidráđiiguin. Roavvenjárgga, Ranua ja Posio boarrásiidráđiid deaivvademiin giite guovllu digitálalaš doarjaga, muhto áššiiddikšun nuppi olbmo beales vásihuvvui váttisin ja dasa gullevaš geavadagat dollojuvvojedje eahpečielggasin. Dilálašvuhtii oassálastán Roavvenjárgga gávpothoavda Ulla-Kirsikka Vainio deattuhii boarrásiidráđiid mearkkašumi mearrádusdahkamis.
Davimus gielddaid deaivvademiin váillahuvvui oahpisteapmi ja doarjja digitálalaš bálvalusaid geavaheapmái, man ii álo leat vejolaš oažžut lagašbálvalussan giliin. Oktavuođaid doaibmamis ledje maiddái váilevuođat davimus Suomas. Deaivvademiin loktanii ovdan maiddái, ahte veahkki, man oažžu ruoktot, ii veahkehan doarvái, ja buresveadjima ovddidandoaibma dáhpáhuvai dávjá menddo guhkkin ja váttis johtinoktavuođaid geahčen. Digitálalaš áššiiddikšuma hástalusat čovdojuvvojit aktiivvalaččat earret eará SámiSostera digifitnus, man ovddasteaddjit serve maiddái boarrásiidáittardeaddji deaivvadeapmái.
Boarrásiidáittardeaddji deattuha, ahte dálá dilis, mas bálvalusat nuppástuvvet johtilit digitálalažžan, lea hui dehálaš, ahte ahkeolbmot ožžot dan digitálalaš doarjaga man sii dárbbašit ja vejolašvuođa dikšut áššiid njunnálagaid dahje telefovnna bokte. Dán ášši ordnen lea buot oassebeliid ovddasvástádussan, mat fállet bálvalusaid. Boarrásiidáittardeaddji maiddái deattuha, ahte doarvái buorit sosiála- ja dearvvašvuođabálvalusat leat buot olbmuid vuođđovuoigatvuohta ássanbáikkis fuolatkeahttá. Eallilan olbmo iežas giela ja kultuvrra lea maid buorre vuhtiiváldit bálvalusain. Guhkes gaskkaid guovlluin doaibmi áššiiddikšunjohtolat ja sáhttobálvalusat dahket vejolažžan boarrásiid árggas birgema.
